puyalon

Alazez de Puyalón.
Os Alazez de Puyalón, os prenzipios que siñan a suya endrezera y os suyos oxetibos, son os siguiens:
Alazet Primero.
Mantener una plataforma permanén (CHA) de os nazionalistas aragoneses de cucha en a vida soziopolitica d’Aragón.
Alazet segundo.
Tener, como Puyalón, siempre l’ambiesta sobre a sobiranía y o sozialismo. Ye un oxetibo que amenista mayor refirme: hemos d’aguaitar ta que, plegato l’inte de cambeo enta una situazión de plena sobiranía o Pueblo siga dispierto y no se frustre por inmadurez u por no trobar-nos paratos.
Alazet terzero.
Esfensa y potenziazión de l’uso de l’aragonés y o catalan en toz os ambitos de a vida política de o País, tal cual a resta de os aspeutos identitarios d’Aragón. Iste oxetibo aduyará á enfortir a ideya d’Aragón como nazión y á creyar un clima ideyoloxico faborable t’as nuestras tesis.
Treballar en a esfensa de o meyo ambién con politicas que guaranzien o Desarrollo Sostenible de o País.
Potenziar politicas que desmilitarizen a soziedá aragonesa.
Enzetar politicas de solidaridá que aduyen ta la consecuzión d’un mundo libre e igualitario.
Chunta á la inmigrazión ta o nuestro proyeuto politico y sozial.
Alazet cuatreno.
Prauticar, d’una man, una politica reibindicatiba t’Aragón ta plegar en o masimo grau competenzial y d’atra man endrezar politicas de trangresión constituzional.
Alazet zinqueno.
No cal albandonar nunca o discurso de cucha y progreso sozial en Aragón. Ye o puesto que mos pertoca, pues istoricamén l’aragonesismo que nusatros reibindicamos ye estato feito por presonas rilazionatas con a cucha sozial.
Alazet sesto.
No son consellables as dibisions en a cucha nazionalista. Treballemos por un compromís de chuntura entre os aragonesistas de cuchas y sigamos capables de creyar un sistema que permita a resoluzión de as nuestras esferenzias y pleitos internos.
Alazet seteno.
No s’han d’adotar ni premitir ideyolochias u definizions firmatas en a esclusión y enfrotinamiento inter-teritorial. Bi ha zierto “aragonesismo” que mincha de a ribalidá biszeral respeutibe á atros Pueblos. Ixe no ye o nuestro aragonesismo, ta nusatros ye de raso buedo de proposas. Acullir istos presupuestos ideyoloxicos u á las personas que los esfiendan, en o nuestro partito sería perchudizial ta os nuestros intreses y oxetibos.
Monzón a cuatro d’abiento de 1999